UNICEF dá apoio de emerxencia ás familias afectadas polo deslizamento de terras en Afganistán

Ás 11:00 horas do venres 2 de maio de 2014 produciuse un gran deslizamento de terras no pobo de Abi- Barak, no distrito de Argo da provincia de Badakhshan, no nordés de Afganistán. Aínda que aínda non se confirmou o número exacto de vítimas, témese que a cifra de mortos sexa alta.

Varios traballadores de UNICEF visitaron hoxe a zona afectada para avaliar a situación, identificar as necesidades máis urxentes e poñer en marcha a distribución da axuda que necesitan as familias afectadas. As nosas prioridades máis urxentes son apoiar as familias que están a ser recolocadas en zonas máis seguras e dar apoio psicosocial urxente aos nenos cuxas vidas se viron máis gravemente afectadas, incluíndo aqueles que perderon os seus pais, familiares e os seus fogares. A distribución de auga potable e saneamento adecuado nas zonas nas que as familias están a ser recolocadas tamén é unha prioridade urxente que UNICEF está a abordar. Cando remate a avaliación da situación, UNICEF ten previsto dar máis apoio nas áreas de saúde, nutrición e educación. Este traballo de emerxencia súmase á resposta dada a grande escala por parte de UNICEF e os seus aliados tras as inundacións producidas na rexión norte de Afganistán a semana pasada que afectaron a unhas 10.000 familias en cinco provincias.