UNICEF: case 3 millóns de recén nacidos poderían salvarse cada ano

Unha innovadora investigación presentada hoxe pola revista británica The Lancet na sede de UNICEF en Nova York, mostra que a maioría dos case 3 millóns de nenos que morren antes de cumprir un mes poderían salvarse se recibisen coidados de calidade no parto, especialmente no caso dos bebés máis vulnerables e en risco de exclusión social.

As mortes de recén nacidos representan un 44 por cento do total de mortes de nenos menores de cinco anos, unha proporción que é maior agora que a rexistrada en 1990. Estas mortes adoitan darse nas poboacións máis pobres e desfavorecidas. "Avanzamos moito evitando a morte de nenos menores de cinco anos, pero o mundo ten unha tarefa pendente cos máis novos e vulnerables", dixo Mickey Chopra, Xefe de Saúde de UNICEF. "Este grupo de nenos necesita atención e recursos. Centrarse nese momento crítico que se produce entre o nacemento e as primeiras horas de vida pode aumentar exponencialmente as posibilidades de supervivencia tanto do bebé coma da nai". Segundo UNICEF, 2,9 millóns de nenos morren cada ano nos seus primeiros 28 días de vida. Ademais, 2,6 millóns de bebés nacen mortos (1,2 millóns desas mortes débense a que o corazón do bebé se detén durante o parto). As primeiras 24 horas despois do nacemento son as máis perigosas para a nai e o seu fillo, de feito, case a metade das mortes acontecen durante este intervalo. A investigación Cada Acabado De Nacer, elaborada por The Lancet, identifica as intervencións máis efectivas para salvar recén nacidos, entre as que se encontran a lactación materna, a reanimación, o 'coidado canguro' para os bebés prematuros -é dicir, contacto prolongado da pel do bebé coa da nai- e a prevención e tratamento de infeccións. Tamén é esencial contar cun equipamento axeitado e un maior financiamento. Os países que lograron os maiores progresos en salvar as vidas dos recén nacidos prestaron especial atención a este colectivo, dentro da atención xeral que se estende a nais e menores de cinco anos. Ruanda -o único país da África Subsahariana en conseguilo- reduciu o número de mortes de recén nacidos á metade dende o ano 2000. Algúns países de renda baixa e media están a obter avances significativos grazas, entre outros métodos, á formación de matronas e enfermeiras na atención ás familias máis pobres con coidados de mellor calidade no parto, especialmente para os bebés que nacen con pouco peso ou enfermos.

 Unha enquisa realizada nos 51 países que concentran o maior número de mortes de recén nacidos botou que, se a calidade da atención recibida nos países máis ricos se universalizase, habería 600.000 mortes menos ao ano -unha redución do 20 por cento. As cifras anuais máis altas deste tipo de mortes danse no Sueste Asiático e África Subsahariana, con India (779.000), Nixeria (267.000) e Paquistán (202.400) á cabeza. Nos países máis castigados, cada dólar investido na saúde da nai ou o bebé reverte nun beneficio social e económico nove veces superior.UNICEF e a Organización Mundial da Saúde lanzarán o mes que vén o Plan de Acción 'Cada Recén Nacido' co obxectivo de rematar coas mortes evitables das nais e os seus fillos antes de 2035. A investigación Cada Acabado De Nacer de The Lancet foi elaborada xunto a expertos de UNICEF, a London School of Hygieneand Tropical Medicine e a Universidade Agha Khan, en Paquistán, entre outros.

### 

Nota para a redacción:

• Os materiais do lanzamento da investigación deThe Lancet, Cada Acabado De Nacer, poden encontrarse aquí: http://press.thelancet.com/ENSeriesLancetRelease.pdf

• O lanzamento da investigación terá lugar na sede deUNICEF en Nova York, co panel de expertos e autores de Cada Acabado De Nacer, e emitirase en streaming dende as 8:30 ás 13:00 (hora de Nova York) hoxe martes 20 de maio en: www.ustream.tv/channel/unicef-lancet-en-series-launch