Os nenos refuxiados e migrantes son os que máis sofren as restricións fronteirizas
A grave situación que se está desenvolvendo nos puntos fronteirizos ao longo da ruta dos Balcáns, en particular na antiga República Iugoslava de Macedonia e en Grecia, está a deixar a miles de nenos desatendidos, angustiados e en risco de padecer abusos e problemas de saúde, segundo UNICEF.
No medio do caos e da confusión
os nenos víronse obrigados a durmir á intemperie en condicións
precarias durante máis dunha semana, sen acceso a servizos básicos
como ducharse ou alimentarse adecuadamente. As familias corren o
risco de separarse, e os nenos quedáronse atrapados fóra dos
centros de tránsito ou en trens durante horas sen destino
algún.
"Aquí estou a ser testemuña de
como nenos pequenos, menores de cinco anos, quedan atrapados entre
dous valos", dixo Jesper Jensen, coordinador de emerxencias no
terreo para UNICEF en Gevgelija, na antiga República Iugoslava de
Macedonia. "Non poden avanzar nin retroceder. Necesitan refuxio e
descanso, e necesitan saber que futuro lles espera".
Ante o rápido desenvolvemento da
situación nos centros de tránsito das fronteiras na antiga
República Iugoslava de Macedonia, UNICEF ampliou a súa resposta.
Esta inclúe facilitar o acceso a instalacións de auga e saneamento,
especialmente para os bebés e os nenos, así como distribuír artigos
de hixiene persoal e alimentos para axudar aos nenos e as súas
familias para facer fronte á difícil situación.
UNICEF reitera o seu chamamento
para levar a cabo un traballo conxunto e coordinado por parte de
todos os gobernos, tanto nas principais rutas de tránsito como nos
países de destino. Ningún neno debería pasar a noite sen acubillo e
acceso a servizos básicos.
Fotos e vídeos dispoñibles aquí: http://uni.cf/1Ob9UKV