O Goberno de Somalia ratifica a Convención sobre os Dereitos do Neno de Nacións Unidas

Coincidindo coa entrada no vixésimo sexto ano da Convención sobre os Dereitos do Neno, Somalia converteuse no Estado Parte número 195 en ratificar a Convención, marcando o camiño para a mellora das vidas dos seus novos cidadáns.

"Ao ratificar a Convención sobre os Dereitos do Neno, o Goberno de Somalia está a facer un investimento no benestar dos seus nenos e, polo tanto, no futuro da súa sociedade", dixo o director executivo de UNICEF, Anthony Lake.

UNICEF celebra este paso importante para Somalia e espera apoiar o esforzo nacional para trasladar os dereitos da Convención en accións prácticas para cada neno.

"A mensaxe central da Convención é que todos os nenos merecen un comezo xusto na vida", dixo o director executivo de UNICEF, Anthony Lake. " Que pode ser máis importante que iso? ".

O proceso de ratificación concluirá unha vez o Goberno de Somalia deposite os instrumentos de ratificación ante Nacións Unidas, en Nova York.

###

Nota para a redacción: UNICEF traballa en Somalia dende 1972, desenvolvendo unha rede de alianzas nacional con máis de 200 ONG nacionais e internacionais, así como organizacións comunitarias, para implementar programas e servizos nas áreas de saúde, nutrición, auga e saneamento, educación e protección infantil. Máis de 160 profesionais en Mogadiscio, Baidoa, Galkayo, Hargeisa e Garowe, levan a cabo o programa e o seu seguimento.

Acerca de UNICEF

UNICEF promove os dereitos e o benestar de todos os nenos e nenas en todo o que facemos. Xunto aos nosos aliados, traballamos en 190 países e territorios para transformar este compromiso en accións prácticas, centrando especialmente os nosos esforzos en chegar aos nenos máis vulnerables e excluídos para o beneficio de todos os nenos, en todas as partes.