Liberia celebra o fin da transmisión do virus do ébola
UNICEF destaca a necesidade de ofrecer mellores servizos para os nenosUNICEF acolleu hoxe con satisfacción o anuncio de que Liberia conseguiu unha vez máis eliminar a transmisión do virus do ébola e expresou a súa esperanza de que o país se concentre agora en recuperarse do brote, que tivo graves repercusións para as vidas de miles de nenos e as súas comunidades.
"Os últimos 17 meses foron un período terrible para os nenos e as
súas familias", dixo Sheldon
Yett,
representante de UNICEF en
Liberia. "Mesmo antes deste brote, os nenos liberianos tiñan un
acceso limitado a servizos sociais de calidade, así como de saúde e
educación. Moitos nenos estaban sen escolarizar e carecían de
servizos sociais, de saneamento e sanitarios de calidade. Agora a
costa que temos que subir é aínda máis empinada".
Máis de 4.500 nenos perderon un ou ambos os dous proxenitores ou
coidadores a causa do ébola en
Liberia, segundo datos do Goberno. A cifra total é de máis de
19.300 nos tres países máis afectados, que tamén inclúen Guinea e
Serra Leoa. Moitas máis persoas sufriron dunha ou outra forma os
efectos da enfermidade, ao ter que permanecer en corentena, ver
morrer os seus seres queridos, perder meses de escolaridade ou non
poder acceder aos servizos de saúde, que quedaron colapsados
durante o brote.
"Agora estamos concentrados en mellorar o acceso a educación, a
saúde e outros servizos a nivel comunitario, e en asegurarnos de
que Liberia estea mellor equipada para enfrontar ameazas futuras
contra a saúde, xa sexa o sarampelo, a
tose ferina ou
o ébola,"
dixo Yett.
UNICEF está
a apoiar os esforzos para fortalecer os sistemas de saúde en
Liberia coa firme intención de mellorar o acceso aos servizos de
saúde comunitarios, a inmunización sistemática e a nutrición, así
como garantir sistemas mellorados de auga, saneamento e hixiene nos
establecementos de saúde nas escolas.
UNICEF tamén
está a proporcionar materiais educativos para axudar a aliviar a
carga das familias que envían aos seus fillos á escola, reconstrúe escolas e apoia a
ampliación dos servizos sociais e os esforzos para reducir a
mortalidade infantil.
Liberia foi declarada por primeira vez libre de transmisión
do ébola o
9 de maio, despois de que tivesen transcorrido 42 días sen que se
producise ningún caso, pero ao mes seguinte xurdiron outra vez
novos casos.
Unha rápida resposta a este brote máis recente por parte do Goberno de Liberia e numerosos aliados, incluídos UNICEF e as comunidades locais, deu como resultado que se contivese rapidamente a propagación do virus do ébola, se tratase os pacientes e se enterrase os mortos segundo estritos protocolos de seguridade. O último paciente con ébola saíu do hospital o 23 de xullo.
Para acceder a vídeos e fotos:
Usuario: Refcom
Contrasinal: uce442087