A lactación materna protexe os bebés de enfermidades transmitidas pola auga
UNICEF destaca a importancia da lactación materna dadas as continuas chuvias e as crecentes inundacións en Bago e Ayeyarwaddy, Myanmar, que aumenta os riscos para os nenos e as súas familias.
O número de nenos e familias afectados polas inundacións continúa
aumentando, alcanzando agora un total de 1,1 millóns de persoas dos
cales preto de 390.000 son nenos. Máis da metade dos afectados son
mulleres, das cales 21.000 están embarazadas e máis de 20.000 son
nais lactantes. A lactación materna adquire unha importancia
fundamental para a saúde do neno, ao ser cada vez máis difícil
garantir que as fontes de auga sexan seguras. A diarrea e as
enfermidades transmitidas pola auga poden ser letais para os nenos
pequenos.
"Neste momento as maiores necesidades son de auga potable, alimentos e nutrición",
dixo Alison
Rhodes,
xefe de sensibilización, alianzas e comunicación
de UNICEF.
"Nas zonas que as inundacións empezaron a retroceder é necesario
iniciar rapidamente a rehabilitación e recuperación para
restablecer os servizos básicos para os nenos".
A escaseza de auga potable e a ausencia de acceso a saneamento
básico aumentan o risco para os nenos de contraer enfermidades
transmitidas pola auga. UNICEF e
os seus aliados enviaron mensaxes en linguas locais a través da
radio sobre prácticas básicas de hixiene e nutrición, chegando a
máis de 4 millóns de persoas nas zonas afectadas.
"Beber auga contaminada produce diarrea, unha das principais causas
de morte entre os nenos menores de cinco anos. Mesturar auga non
potable cos alimentos como a fórmula infantil en po, pode ser moi
perigoso. A lactación materna exclusiva é a forma máis segura de
alimentar os bebés e o leite materno contén todos os nutrientes e
anticorpos para protexer a súa saúde",
explicou Rhodes.
UNICEF está
a traballar xunto ao goberno para satisfacer as necesidades
urxentes de todos os nenos e as súas familias que se encontran en
refuxios temporais, e daqueles que intentan volver ao seu fogar.
Ademais de avaliacións conxuntas de axuda humanitaria inmediata e
das primeiras necesidades de recuperación nas zonas máis
afectados -Sagaing, Magway, Rakhine, Bago e Ayeyarwaddy-UNICEF está
a liderar a avaliación no estado de Chin,
un dos máis pobres e de máis difícil acceso
de Myanmar.
UNICEF está
a axudar no restablecemento do acceso a auga potable e saneamento
mediante a construción de latrinas e distribúe pastillas de
purificación de auga e kits de hixiene. Para protexer o
desenvolvemento saudable dos nenos tamén está a proporcionar de
xeito urxente micronutrientes, kits de protección e apoio
psicosocial.
"Para aumentar o apoio, UNICEF fai
un chamamento de fondos para distribuír asistencia humanitaria
urxente para todos os nenos afectados polas inundacións
en Myanmar"
concluíu Rhodes.