A grave crise nutricional en Nixeria pon en risco a vida de 400.000 nenos
UNICEF dobra a petición de fondos necesaria para prestar asistencia humanitaria no nordés do país
UNICEF revisou o seu chamamento humanitario para Nixeria, aumentando os recursos necesarios de 55 millóns de dólares a 115 millóns para poder asistir a 750.000 persoas máis nas zonas en conflito no noroeste do país ás que até agora non se podía chegar.
A medida que a asistencia
humanitaria vai chegando a novas zonas, está a porse de manifesto a
dimensión real da crise relacionada con Boko Haram e o seu impacto
nos nenos. Estímase que 400.000 nenos menores de 5 anos sufrirán
desnutrición aguda grave este ano en 3 estados do nordés. Máis de 4
millóns de persoas enfróntanse a unha grave escaseza de alimentos e
65.000 viven en condicións de fame negra, a maioría no estado de
Borno, o estado máis afectado.
"As vidas dos nenos están
literalmente pendendo dun fío", afirmaba Afshan Khan, director dos
programas de emerxencia de UNICEF. "Estamos a chegar a zonas ás que
antes non se podía chegar con asistencia humanitaria crítica, pero
necesitamos un maior apoio internacional para seguir aumentándoa e
chegar a todos os nenos en extrema necesidade", engadiu.
A destrución completa de cidades
e pobos segue complicando a resposta. O 60% dos centros de saúde
foron parcial ou completamente destruído, e o 75% das instalacións
de auga e saneamento no estado de Borno necesitan rehabilitación.
Case 1 millón de nenos viven
desprazados no nordés do país, 1 millón están fóra do colexio e
centos de miles fóronse afectados psicoloxicamente debido aos
horrores polos que tiveron que pasar.
A falta de acceso aos nenos,
debido ao conflito, tamén deu lugar a un brote de polio no estado
de Borno, onde se confirmaron en agosto e setembro 3 casos do virus
da poliomielitis. O chamamento de fondos de UNICEF enmárcase dentro
da posta en marcha dunha serie de campañas de emerxencia en materia
de nutrición e inmunización contra a polio no nordés de Nixeria e
nos países veciños, co obxectivo de chegar a 1,8 millóns de nenos,
só no estado de Borno. A campaña de inmunización está ademais
identificando e tratando a nenos con desnutrición grave.
UNICEF aumentou a súa resposta
nas áreas máis afectadas polo conflito relacionado con Boko Haram
desde abril, apoiando a asistencia sanitaria e nutricional para
nenos e nais, e axudando a fornecer auga potable e saneamento,
servizos de protección infantil e oportunidades de
aprendizaxe.
Desde o inicio de 2016, 2,6
millóns de persoas afectadas polo conflito tiveron acceso aos
servizos preventivos de saúde apoiados por UNICEF, e case 75.000
nenos foron tratados de desnutrición aguda grave no nordés de
Nixeria. A construción e rehabilitación de pozos permitiu que case
medio millón de persoas teña mellores accesos a auga potable. Os
espazos seguros de aprendizaxe, a formación de profesores e
material educativo axudaron a máis de 72.000 nenos a retomar a súa
educación e a aproximadamente 133.000 nenos recibiron apoio
psicosocial.
Ata a data, só recibíronse 28
millóns de dólares dos 115 millóns do chamamento, o que supón un
serio obstáculo para ampliar o plan de acción de
UNICEF.
Acerca de UNICEF
UNICEF promove os dereitos e o
benestar de todos os nenos e nenas en todo o que facemos. Xunto aos
nosos aliados, traballamos en 190 países e territorios para
transformar este compromiso en accións prácticas, centrando
especialmente os nosos esforzos en chegar aos nenos máis
vulnerables e excluídos para o beneficio de todos os nenos, en
todas partes.
