A escaseza de subministracións esenciais ameaza a millóns de nenos en Nepal este inverno
En Nepal, máis de tres millóns de nenos menores de cinco anos están en risco de morrer ou contraer enfermidades durante os duros meses de inverno. Isto débese á grave escaseza de combustible, alimentos, medicamentos e vacúas, segundo advirte UNICEF.
A importación de produtos
esenciais restrinxiuse na fronteira meridional de Nepal durante as
dez últimas semanas, por mor dos disturbios pola nova constitución
do país.
Os almacéns médicos rexionais do
goberno xa se quedaron sen vacúas BCG contra a tuberculose. As
existencias doutras vacinas e antibióticos están tamén baixo
mínimos.
Os nenos, que seguen
recuperándose dos dous grandes terremotos de abril e maio, poderían
ser os máis afectados. Máis de 200.000 familias afectadas polos
sismos continúan vivindo en aloxamentos temporais a unha altura
superior aos 1.500 metros, onde as condicións climáticas poderían
empeorar conforme avance o inverno.
"O risco de hipotermia e
desnutrición, e a escaseza de medicamentos e vacúas, pode ser unha
combinación potencialmente mortal para os nenos este inverno", dixo
Anthony Lake, director executivo de UNICEF. "Durante a miña recente
visita a Nepal fun testemuña de primeira man das precarias
condicións de vida de moitos sobreviventes do terremoto. Agora
poderían enfrontarse a un novo desastre, sen os alimentos,
protección fronte ao frío ou asistencia sanitaria adecuados".
Tamén se teme que a dependencia
cada vez maior da leña, debido á crise do combustible, aumente a
contaminación, que podería traducirse nun repunte de casos de
pneumonía. O ano pasado máis de 800.000 nenos menores de cinco anos
sufriron esta enfermidade en Nepal, e uns 5.000 morreron.
Espérase que nos próximos dous
meses nazan en Nepal 125.000 bebés, que están nun risco especial. O
servizo de ambulancias do país está afectado pola crise do
combustible, e isto causou unha caída dos nacementos en hospitais e
centros de saúde. A falta de combustible para a calefacción aumenta
tamén o risco de hipotermia e morte dos recentemente nados, que non
poden controlar a súa temperatura corporal.
"A difícil situación que afrontan
os nenos e as súas familias agrávase cada día, e empeorará nos
meses de inverno?, dixo Karin Hulshof, directora rexional de UNICEF
para Asia Meridional. ?Os nenos necesitan ser protexidos da
enfermidade, o frío e a fame. UNICEF insta a todas as partes a
abordar as restricións ás importacións esenciais de
subministracións a Nepal. Non hai tempo que perder".