Día Mundial da Poliomielitis: menos nenos que nunca con polio
Nunca antes na historia da poliomielitis tan poucos nenos contraeran este virus paralizante en tan poucos países, aínda que non podemos descansar ata que o número de casos chegue a cero, dixo UNICEF na véspera do Día Mundial da Poliomielitis.
"Os progresos para pór fin á
poliomielitis son reais e impresionantes, xa que na actualidade
soamente hai dous países no mundo onde nunca se interrompeu o
virus: Afganistán e Paquistán", dixo Peter Crowley, director da
Unidade da Poliomielitis de UNICEF. "Pero -e estamos a falar dun
gran pero- ata que todos os nenos en todas partes sexan inmunizados
de maneira rutineira e sistemática contra a poliomielitis, a ameaza
continúa. Non podemos baixar a garda; temos que seguir adiante até
lograr que non quede nin un só neno sen vacinar en ningures".
Fai só tres anos, en Nixeria
rexistrábanse a metade de todos os casos de polio no mundo. Este
ano, por primeira vez na historia, Nixeria logrou interromper a
transmisión do poliovirus salvaxe, e o mes pasado foi eliminado da
lista de países endémicos de polio. Este importante logro puxo a
Nixeria e á rexión de África máis preto que nunca de obter a
certificación de libre de polio. Na India, onde miles de nenos
sufrían todos os anos a parálise provocada pola poliomielitis, non
se produciu ningún caso desde fai catro anos. En todo o mundo
rexistráronse soamente 51 casos do virus salvaxe da poliomielitis
desde comezos de 2015, en comparación cos 242 casos de 2014.
Estes éxitos son o resultado da
vontade política e o liderado dos gobernos nos países afectados; a
gran mobilización e participación das comunidades; a valentía e o
compromiso dos traballadores de primeira liña; e os esforzos
conxuntos e coordinados dos aliados da Iniciativa Mundial para a
Erradicación da Poliomielitis: os Centros para o Control e
Prevención de Enfermidades, a Organización Mundial da Saúde, a
Asociación Rotary Internacional, a Fundación Bill e Melinda Gates e
UNICEF.
Como parte da súa contribución a
esta iniciativa, UNICEF distribuíu 1,7 millóns de doses de vacinas
en 2014 e apoiou a capacitación de decenas de miles de
traballadores de primeira liña nas comunidades, desde Karachi en
Paquistán ao estado de Kano en Nixeria, axudando a que os pais e as
comunidades confiasen na vacina. Outros elementos que contribuíron
ao éxito foron a integración nas campañas contra a poliomielitis
doutras intervencións vitais para os nenos, como a vacinación
sistemática, a nutrición, o lavado de mans con xabón e a lactación
materna, especialmente nas zonas que reciben menos servizos e nas
rexións de alto risco.
A pesar deste progreso, os
recentes brotes do virus derivados da vacina en países como a
República Democrática Popular Lao, Ucraína, Guinea e Madagascar,
puxeron de relevo os riscos que afrontan moitos países debido á
baixa cobertura de inmunización sistemática. Estes brotes serven
como un recordatorio da necesidade esencial de intensificar os
esforzos para fortalecer os sistemas de inmunización sistemática e
abordar as desigualdades no acceso dos nenos aos servizos básicos
de saúde. En Ucraína, por exemplo, menos do 14% dos nenos están
vacinados contra a polio.
"O noso obxectivo é deter
totalmente a transmisión de poliomielitis o próximo ano para estas
datas, pero a única maneira de logralo é que os países con taxas
baixas de vacinación redobren os seus esforzos para chegar a todos
os nenos, alí onde estean, e sen importar o difícil que resulte",
dixo Peter Crowley.
Para descargar vídeos e fotos:
ftp://video.unicef.es/vacunacion
usuario Refcom
contrasinal: uce442087