A desnutrición aumenta a medida que O Neno se intensifica
Case un millón de nenos necesitan tratamento por desnutrición aguda grave en África oriental e meridional, segundo UNICEF. Dous anos de choivas irregulares e secas combinadas cun dos episodios máis intensos do Neno nos últimos 50 anos, están a causar estragos nas vidas da infancia máis vulnerable.
En toda a rexión, millóns de
nenos están en risco de padecer fame, enfermidades e escaseza de
auga. Esta situación vese agravada polo aumento dos prezos dos
alimentos, o que obrigou ás familias para adoptar medidas drásticas
como saltarse comidas ou vender bens.
"O fenómeno meteorolóxico do Neno
diminuirá, pero o custo para os nenos -moitos dos cales xa vivían
en contextos precarios- farase notar nos próximos anos", indicou
Leila Gharagozloo-Pakkala, directora rexional de UNICEF para África
Oriental e Meridional. "Os gobernos están a responder cos recursos
dispoñibles, pero trátase dunha situación sen precedentes. A
supervivencia dos nenos depende da acción que levemos a cabo
hoxe".
Lesotho, Zimbabwe e moitas
provincias de Sudáfrica declararon o estado de emerxencia ante a
crecente escaseza de recursos. En Etiopía, espérase que o número de
persoas que necesitan asistencia alimentaria aumente de 10 para 18
millóns a finais de 2016.
No seu informe máis recente sobre
o impacto do fenómeno nos nenos da rexión, UNICEF sinala que:
- En Etiopía, dúas tempadas de escasas choivas provocaron que actualmente case seis millóns de nenos necesiten asistencia alimentaria, o que á súa vez aumenta o absentismo escolar, ao ter os nenos que percorrer grandes distancias para atopar auga.
- En Somalia, máis de dous terzos de quen necesita axuda humanitaria urxente é poboación desprazada.
- En Kenia, as fortes choivas e inundacións relacionadas co Neno son un factor agravante do brote do cólera.
- En Lesoto, un cuarto da poboación vese afectada pola situación climatológoca. Isto empeora as circunstancias xa graves dun país no que o 34% dos nenos son orfos, o 57% da poboación vive por baixo do limiar da pobreza e case un de cada catro adultos ten VIH/Sida.
- En Zimbabwe, calcúlase que 2,8 millóns de persoas sofren inseguridade alimentaria e nutricional. A situación de seca tivo como resultado unha redución do rendemento hídrico dos poucos pozos en funcionamento, o que aumenta o risco de enfermidades transmitidas pola auga, especialmente diarrea e cólera.
- Malawi enfróntase a unha das peores crises alimentarias do últimos nove anos, con 2,8 millóns de persoas (máis do 15% da poboación) en risco de padecer fame. Os casos de desnutrición aguda grave aumentaron un 100% en dous meses, de decembro do 2015 a xaneiro de 2016.
- En Angola, calcúlase que 1,4 millóns de persoas están afectadas polas condicións climatolóxicas e 800.000 sofren inseguridade alimentaria, principalmente nas provincias semiáridas do sur.
A Oficina de Coordinación de
Asuntos Humanitarios de Nacións Unidas (OCHA) estima que aínda
mellorando as condicións agrícolas na última metade do ano, as
comunidades afectadas tardarán aproximadamente dous anos en
recuperarse da grave seca causada polo Neno.
Só se financiou un 15% do
chamamento humanitario de UNICEF na rexión dos países do Sur de
África afectados polo Neno.
O chamamento humanitario de
UNICEF nos países afectados polo Neno:
- $26 millóns en Angola
- $87 millóns en Etiopía
- $3 millóns en Lesotho
- $11 millóns en Malawi
- $15millóns en Somalia
- $1 millóns en Swazilandia
- $12 millóns en Zimbabwe