Declaración do director executivo de UNICEF, Anthony Lake, con motivo do 50º aniversario da obtención do Premio Nobel da Paz por parte de UNICEF
"Cando o segundo director executivo de UNICEF, Henry Labouisse, aceptou o Premio Nobel da Paz en nome de UNICEF en 1965, afirmou que "o benestar dos nenos de hoxe está directamente vinculado á paz do mundo de mañá". Hoxe, nun mundo en crecente axitación, as súas palabras aínda seguen vixentes. E fálannos a todos.
Mentres un neno nado en 2015 ten
moitas máis probabilidades de sobrevivir e desenvolver o seu
potencial que uno nacido en 1965, hoxe o benestar de moitos nenos
está ameazado polo conflito e a crise, as carencias e as
desvantaxes. Moitos están a ser testemuñas e vivindo cousas que
ningún neno debería afrontar xamais. E en cada comunidade,
demasiados nenos están a crecer con privación de todo o que
necesitan para estar sans e fortes.
Cando traballamos para chegar a
estes nenos - para aliviar o seu sufrimento, para axudarlles a
crecer e aprender - non estamos só dándolles unha oportunidade de
ter un futuro. Estamos a darlles a oportunidade de construír un
futuro mellor para eles mesmos, as súas familias e as súas
comunidades. Unha xeración de nenos non só capaces senón tamén
dispostos a crear sociedades máis fortes, estables e pacíficas.
Unha xeración renovada, non ferida.
Cada neno ten o dereito á
tranquilidade dunha infancia normal. UNICEF traballou cada día
desde que tivemos a honra de recibir o Premio Nobel da Paz, e
continuará traballando para avanzar nos dereitos de cada neno, onde
queira que estean. Porque este é o camiño máis seguro para que a
paz sexa posible".
Para descargar material multimedia: