UNICEF e H&M, polo mellor comezo na vida dos nenos
UNICEF e H&M asinaron unha nova alianza a tres anos pola que a fundación da firma de roupa apoiará unha campaña global dirixida ao desenvolvemento da primeira infancia, de forma que os nenos, especialmente os máis vulnerables, poidan ter o mellor comezo posible na vida.
A Fundación H&M Conscious contribuirá con 9,3 millóns de dólares (uns 6,8 millóns de euros) á posta en marcha de proxectos piloto en varios países cuxo obxectivo é ampliar o desenvolvemento infantil temperán e animar os gobernos a investir máis nos primeiros anos da vida do neno. Así mesmo, estes fondos servirán para apoiar a realización dun informe global sobre desenvolvemento infantil temperán que verá a luz a finais de 2016, e dunha App (aplicación informática para dispositivos móbiles ou tablets) que permitirá aos lexisladores acceder a datos críticos en tempo real sobre desenvolvemento infantil temperán. "A nova alianza coa Fundación H&M Conscious é un exemplo importante dunha alianza que axudará a mobilizar apoio e empregar a innovación para impulsar o potencial dos nenos, en calquera lugar", afirmou a directora de Captación de Fondos Privados e Alianzas de UNICEF, Leila Pakkala. "Os dez anos de colaboración de H&M con UNICEF deunos información e experiencias de primeira man do seu traballo a favor da infancia en países en vías de desenvolvemento (...) UNICEF está altamente preparado e cualificado para colocar o desenvolvemento infantil temperán na axenda global e conseguir así que un maior número de nenos en situación de vulnerabilidade poidan acceder a programas de aprendizaxe temperá como pre-escolar", manifestou pola súa banda o director xeral de H&M, Karl-Johan Persson.
O DESENVOLVEMENTO INFANTIL E A APRENDIZAxE TEMPERÁ
Os primeiros oito anos da vida do neno son fundamentais, especialmente os tres primeiros anos, que son a base da saúde, o crecemento e o desenvolvemento no futuro. Durante este período, as nenas e os nenos aprenden máis rapidamente que en calquera outra época. Os recén nacidos e os nenos de curta idade desenvólvense con maior rapidez e aprenden máis rapidamente cando reciben amor e afecto, atención, alento e estímulos mentais, así como alimentos nutritivos e unha boa atención da saúde. UNICEF traballa cos gobernos, a sociedade civil, as comunidades e outras partes interesadas para deseñar e implementar políticas e programas de desenvolvemento da primeira infancia. Estes axudan aos nenos máis vulnerables e excluídos a alcanzar o seu máximo potencial a través do apoio ás familias e as comunidades, e aumentando o acceso á atención e educación de calidade na primeira infancia. A contribución da Fundación H&M Conscious axudará a fortalecer un movemento global para promover a inclusión da primeira infancia na Axenda de Desenvolvemento Post 2015.
¿Te gustaría hacer algo extraordinario hoy?
Hazte socio. Elige ahora tu aportación mensual.
